DOF, gitinguha ang P30-Billion nga kita gikan sa pagbaligya sa mga wala magamit nga kabtangan sa gobyerno

BUTUAN CITY- Nakalikom ang gobyerno og P1 bilyon gikan sa pagbaligya sa mga yunit niini sa Atrium of Makati, samtang nagtinguha usab kini nga makatigom og hangtod P30 bilyon pa sa katapusan sa tuig pinaagi sa pagpribatisa sa ubang mga idle assets, lakip ang Mile Long Complex, Food Terminal Inc. kon FTI, ug ang bahin niini sa South Luzon Expressway Corporation.

Sumala sa Department of Finance-Privatization Management Office kon DOF-PMO, ang maong mga lakang kabahin sa paningkamot sa gobyerno sa pagpalig-on sa pondo alang sa nasudnong kalamboan pinaagi sa episyente ug transparenteng pagbaligya sa mga kabtangan nga wala na magamit.