BUTUAN CITY – Gipasakaan na og mga kasong robbery with intimidation of persons, direct bribery, paglapas sa Section 3 sa Anti-Graft and Corrupt Practices Act ingon man paglapas sa Section 7 in relation ngadto sa Section 11 sa Code of Conduct and Ethical Standards for Public Officials and Employee, ang director sa Securities and Exchange Commission (SEC)–Butuan Extension Office human kini nasikop sa gilusad nga entrapment operation niadtong Mayo 29 tungod matud pa sa pagpangilkil.
Nasayrang gisikop sa mga personahe sa National Bureau of Investigation-Regional Office Caraga si Atty Jason Tan, sulod sa usa ka coffee shop sa usa ka mall ning siyudad sa Butuan.
Gilusad ang operasyon uban sa pakig-alayon sa SEC, aron maprotektahan ang ilang reputasyon gikan sa pipila ka mga dili maayong mga personahe ug opisyal sa komisyon.
Gihimo ang operasyon base na sa reklamo nga giduso sa SALiGAL Law, ang counsel alang sa HMW Lending Investors, Inc. kon HLI, nga nag-akusar kang Tan ug usa ka wala mailang kakunsabong babaye nga mi-demand og kwarta gikan sa HLI bugti sa dili na pagpasaka og mga kasong administratibo tungod sa paglapas sa Revised Corporation Code ug sa Lending Company Regulation Act of 2007.
Ang inisyal matud pa nila nga demand mi-abot sa ₱650,000.00 kansa mag-cover na sa 13 ka mga branches sa HLI dinhi sa Caraga Region — hangtud na nahangyo kini ngadto sa ₱250,000.00, kondiin ₱80,000.00 lang ang duna’y officially receipt samtang ang nahabiling ₱170,000.00, direktang mipadulong kang Tan. Una nang gipa-ilalom sa preventive suspension si Tan samtang nagpadayon ang imbestigasyon.
