BUTUAN CITY – Gikumpirma ni Dr. Bernadette Montenegro sa National Meat Inspection Service kon NMIS-Caraga nga bugtong ang probinsya na lang sa Dinagat Islands sa tibuok rehiyon ang wala masudli sa African Swine Fever kon ASF.
Kini human nga nakatala na usab og mga kaso sa ASF ang Brgy. Abilan ug Alubhid sa lungsod Buenavista apil na sa Las Nieves nga parehong sakop sa Agusan del Norte samtang posibleng sunod semana na makumpirma ang kaso usab sa Talacogon, Agusan del Sur.
Sa eksklusibong pakighinabi sa Bombo Radyo Butuan, gipadayag ni Dr. Montenegro nga sa Surigao del Norte, natala kini bag-uhay lang sa lungsod sa Claver, pila ka adlaw adiser nasigpatan ang kaso sa duha ka purok sa Brgy. Florida ning siyudad sa Butuan.
Gipasabot pa ni Dr. Montenegro nga grabe ka-isog ang maong kagaw kumpara sa COVID-19 tungod sa kataas sa potency niini.
Higayong duna’y ma-monitor nga binuhing baboy nga mamatay tungod sa ASF, tunga sa kilometro ang kadelikadong mahatud nga impeksyon sa maong virus gikan sa kaso hinungdan nga kinahangang pamatyon ang tanang mga baboy nga sulod sa maong radius sa ingon masumpo ang pagkaylap niini ilabina nga siento-porsiento ang mortality rate niini. (
Giklaro pa ni Montenegro nga daghang paagi ang pagkaylap sa maong virus sama sa pagbahog sa mga binuhing baboy og mga salin nga pagkaong karneng infected sa ASF.
Anaa pa ang pag-adto sa usa ka tawong gikan sa infected nga farm ngadto sa babuyan ingon man ang lokal nga bahog nga gigamit sa pagpakaon kanila. Hinuon mahimong maprotektahan ang mga binuhing baboy pinaagi sa pag-amping og maayo sa mga babuyan.
