BUTUAN CITY – Maglusad og virtual orientation karong Dominggo, Enero 30 ang mga personahe sa Department of Information and Communications Technology kon DICT-Caraga aron mas mapasabot pa ang mga Caraganons sa kamahinungdanon sa pagparehistro sa ilang mga SIM cards.
Sa eksklusibong pakiginabi sa Bombo Radyo Butuan, gipadayag ni Ralph Gomez, project development officer sa DICT-Caraga, nga nag-unang papel sa ilang ahensya mao ang pagkolekta sa mga datus, ID nga i-upload ngadto sa mga telecommunication companies kon telcos ug uban pang dokumento nga kinahanglanon sa pagparehistro sa mga SIM card users.
Sa pagkakaron, ang lugar matud pa diin nag-assign ang National Telecommunications Commission kon NTC diin makaparehistro ang mga SIM card users mao ang lungsod sa Tagbina, Surigao del Sur nga himuon sa ilang municipal gym ugmang adlawa, Enero 27.
Kini matud pa ang hinungdan nga sa Enero 30 nila nga virtual orientation, hayan sabutan ang pagdugang pa og registration hubs aron masiguro nga makarehistro ang tanan sa ingon dili makansela ang ilang mga SIM cards ug ila pang magamit.
