BUTUAN CITY- Nagbangga ang depensa ug prosekusyon sa impeachment trial sa isyu sa pagsunod sa mga lagda sa paggamit sa confidential funds. Sumala ni defense counsel Atty. Michael Poa nga hugot nga gisunod sa Office of the Vice President (OVP) ug Department of Education (DepEd) ang Joint Circular No. 2015-01, ilabina ang probisyon nga nagtugot lamang sa awtorisadong Special Disbursing Officers (SDOs) sa pag-encash sa confidential funds, diin gipaila niini sila Gina Acosta alang sa OVP ug Edward Fajarda alang sa DepEd.
Apan, gisukol kini ni private prosecutor Atty. Lorna Kapunan, kinsa mingbutyag nga makalibog ang maong pangatarungan tungod kay ang pagsunod sa usa lamang ka probisyon dili awtomatikong nagpasabot nga natuman ang tanang gikinahanglang lagda sa paggamit ug liquidation sa confidential funds.
Sa tubag ni Poa, iyang gipasabot nga ang iyang argumento nagtumong lamang sa isyu kung kinsa ang adunay awtoridad sa pag-encash sa maong pondo.
