BUTUAN CITY – Gideklarang dead-on-arrival sa attending physician ang usa ka dalaga human naligsan sa nagsunod kanilang sakyanan dihang mi-ambak kini sa gisakyan niyang motorsiklo kaganinang alas-2:20 sa kaadlawon.
Naila ang biktimang si Mary Grace Burias, 23-anyos residente sa Purok 5, Sitio Damayan Brgy. Libertad ning siyudad sa Butuan.
Migawas sa inisyal nga imbestigasyon sa Butuan City Police Station 3, nga naglalis ang biktima ug ang ka-ipon niining si Junalyn Lacson Tabunga, 25-anyos, taga-Brgy. Basilisa, RTR, Agusan del Norte samtang sakay sa motorsiklo padulong sa kasadpang bahin.
Apan dihang anaa na sila sa crossing sa Josephine Homes sa Brgy. Libertad, kalit lang matud pang mi-ambak sa gisakyang motorsiklo ang naka-inom nga dalaga rason nga nadasmagan kini sa nagsunod nga sakyanang wala man lang mihunong pa.
