BUTUAN CITY – Andam ibulgar ni Kanhi Ilocos Sur Governor Chavit Singson ang iyang nahibal-an kabahin sa nadiskubreng anomalya sa mga flood control projects sa gobyerno.
Sumala pa niini, adunay dako nga personalidad nga iyang hisgutan sa higayon nga moatubang siya sa pagdungog nga ipahigayon sa Senado.
Sa interbyu sa Bombo Radyo sa kanhi gobernador, iyang gipasalig nga maghisgot siya og mga ngalan nga nalambigit sa isyu sa flood control.
Apan sa dihang gipangutana kung kinsa o unsang posisyon kini, midumili siya sa pagpadayag ug miingon nga didto na lang niya kini tubagon sa Senado.
Dili niya gustong unhan ang pagdungog sa Senate Blue Ribbon Committee bahin sa imbestigasyon sa kontrobersyal nga mga proyekto.
Bisan pa niini, iyang gipasalig nga motambong ug motungha siya sa hearing kung siya imbitahon o ipatawag sa komite sa Senado.
Sa laing bahin, gipaundang sa makadiyot sa Senado ang nakatakdang pagbalik sa komite aron ipadayon ang pagdungog sa imbestigasyon sa flood control.
Unsa unta kini ipahigayon sa Abril 14, apan dili kini madayon tungod kay gihulat pa ang pormal nga pagsumite sa affidavit ni kanhi Gov. Singson.
Apil usab sa gikonsiderar sa pag-postpone ang pirma sa pipila ka mga senador ug uban pang rason.
Gipanghimakak sa kanhi gobernador nga siya ang hinungdan nganong wala madayon ang maong pagdungog.
Sigon niini, andam siya sa pagdala sa iyang salaysay ngadto sa Senado bisan unsang orasa kung pangayoon kini ni Sen. Panfilo Lacson, nga nagsilbi isip Chairperson sa Senate Blue Ribbon Committee.
Midumili usab si kanhi Gov. Singson sa paghatag og dugang detalye bahin sa sulod sa iyang affidavit nga plano niyang isumite sa komite o sa opisina sa Senado.
Giklro niini nga napirmahan ug na-notaryo na ang maong dokumento.
