BUTUAN CITY – Naigo sa gihimong pag-atake sa Ukraine ang usa ka dako nga oil terminal sa amihanan-kasadpang siyudad sa St. Petersburg sa Russia.
Gihulagway ni Volodymyr Zelensky, presidente sa Ukraine nga kini usa ka mahinungdanong “imprastraktura nga naghatag og kita para sa gubat sa Russia.” Gidugang pa niini nga naigo usab ang usa ka dakong naval base sa Russia sa maong rehiyon.
Gikumpirma usab ni St. Petersburg Governor Aleksandr Beglov nga ang siyudad nailalom sa usa ka dakong pag-atake sa drone dayung angkon nga naigo ang oil terminal apan wala hinooy nakalas nga kinabuhi.
Bag-ohay lang, gipaspasan sa Ukraine ang ilang mga long-range drone attack sa mga kritikal nga imprastraktura sa enerhiya sa Russia diin sumala sa Kyiv, hapit 43% sa kapasidad sa oil refining sa Russia ang “naparalisa” tungod niini.
Gibutyag sa Ukraine nga ang mga pasilidad sa lana ug gas sa Russia mga lehitimong target tungod kay nagsalig og dako ang Moscow sa pag-eksport og fossil fuel aron pondohan ang ilang tibuok-gubat nga pag-atake nga nagsugod niadtong Pebrero 2022.
