BUTUAN CITY – Pormal nang gisugdan kagahapong adlawa Lunes, Pebrero 8, sa Philippine Information Agency ug sa Presidential Communications Operations Office kon PCOO dinhi sa Caraga Region partikular dinhi sa dakbayan sa Butuan ang COVID-19 vaccines roll out caravan.
Sa eksklusibong pakighinabi sa Bombo Radyo Butuan, gibutyag ni PIA Director General Ramon Cualoping III nga importante kaayo alang sa nasudnong kagamhanan nga masabtan sa mga Filipino ang kamahinungdanon sa vaccine rollout.
Gipasabot ni Cualoping nga importante ang pagpabakuna sa tanan aron makabalik kita sa daan nga normal niadtong wala pa ang pandemyang hatud sa coronavirus.
Dugang pa sa opisyal, gusto lang ni Pangulong Rodrigo Duterte nga masulbad na ang problema sa panglawas sa nasud kansa na-manage na human gipatuman ang Mask-Iwas-Hugas campaign nga karon mahimo nang mas palig-unon pa pinaagi sa COVID-19 vaccine alang sa kalig-unan usab sa lawas aron batukan ang COVID-19.
Giklaro pa ni Cualoping nga kung dili makab-ot ang tinguha sa nasudnong kagamhanan nga matupukan og bakuna ang 70-porsiento sa populasyon sa mga Filipino, dili makab-ot ang gipunting nga herd community.
Alayon niini, gikan mismo sa baba sa opisyal, mihangyo siya uban sa tanang sa Bombo Radyo Philippines, ang number 1 radio network sa nasud nga tabangan ang kagamhanan aron masabtan sa katawhan ang katuyuan sa maong kampanya.
