BOMBO BUTUAN – Nadugangan na usab og 13 ka mga bag-ong kaso sa COVID-19 samtang duha ang patay ang dakbayan sa Butuan gikan sa 17 ka mga bag-ong kaso nga natala ning rehiyon sa Caraga ning adlawa.
Kini base na sa gipagawas nga datus sa Department of Health-Center for Health and Development kon DOH-CHD Caraga kaganina.
Gawas sa Butuan. nakatala usab og duha ka mga kaso ang Bislig City sa Surigao del Sur samtang tag-usa sa lungsod sa Buenavista, Agusan del Norte ug Tandag City sa Surigao del Sur.
Apil sa namatay ang usa ka 81-anyos nga babayeng taga-Brgy. Doongan kinsa gidala sa ospital tungod sa hilanat, ubo, kalibanga ug lisod nga pagginhawa.
Gikuhaan siya og swab sample niadtong Septembre 9 ug nakumpirmang positibo sa COVID-19 sa Septembre 13 apan namatay paglabay sa tulo ka mga adlaw.
Samtang sa 13 ka mga kaso sa Butuan, upat niini ang taga-Brgy. Fort Poyohon, 3 sa Brgy. JP Rizal, tagduha sa Brgy. Libertad ug New Society Village samtang tag-usa usab sa Brgy. Bayanihan ug Villa Kananga.
Tungod niini, duna na karo’y 474 ka cumulative COVID-19 cases ang siyudad gikan sa 461 nga natala kagahapon kondiin apil sa maong mga kaso ang mga frontliners ning siyudad sama sa mga healthcare workers.
