BUTUAN CITY – Gibasura sa Court of Appeals 3rd Division ang petisyon ni kanhe Negros Oriental congressman Arnolfo Teves Jr. nga nagkuwestiyon sa matud pa grave abuse of discretion ni Manila RTC Branch 12 Judge Renato Enciso mahitungod sa search warrants niadtong 2023.
Ang petisyon may kalambigitan sa search warrants para sa mga armas, bala, ug explosives nga gi-isyu niadtong 2023 batuk kang Teves ug sa iyang mga anak nga sila Kurt Matthew ug Axl.
Gipamugos ni Teves nga nasayup ang hukom tungod kay wala matud pa niini gipawalay-bisa ang search warrants ug wala usab gipug-an ang paggamit sa mga nakuhang ebidensya.
Gikuwestiyon usab niya ang testimonya sa mga saksi, lakip ang usa ka kanhe STL collector ug usa ka pulis nga matud pa walay personal nga kahibalo sa mga armas.
Bisan paman gibutyag sa CA nga napakyas si Teves nga pamatud-an ang dakong kasaypanan sa hukom ug wala kini nakitang gross misapprehension of facts.
Sigon sa korte, nasunod ang tukmang proseso sa pagkuha sa testimonya ug legal ang sakopt sa search sa tibook balay.
Tungod niini, gipaboran sa CA ang bisa sa search warrants ug gikonsidera nga legal ang mga nakumpiskang armas ug ebidensya.
Mahinumdumang nag-atubang pag-usab si Teves sa kasong multiple murder mahitungod sa pagpatay kang kanhe Negros Oriental Governor Roel Degamo ug siyam pa.
Sa kasamtangan, napriso si Teves sa Metro Manila District Jail (MMDJ) sa Camp Bagong Diwa, Taguig City samtang gitaral ang iyang kaso.
