BUTUAN CITY- Gipasabot ni Agusan del Norte Representative Dale Corvera ang iyang pagbotar supak sa impeachment batok kang Vice President Sara Duterte. Sa iyang pagpasabot sa iyang boto, gipadayag ni Cong Corvera, nga ang iyang pagbotar base sa pulso sa katawhan nga iyang girepresentahan nga kadaghanan dili pabor sa impeachment complaint.
Dinhi na dayon niya gibutyag nga isip napili nga representante sa mga Agusanons, iyang gibati nga obligasyon niya ang pagpaminaw sa ilang posisyon sa pagbotar. Gibutyag usab ni Corvera, nga ang iyang desisyon usa ka klarong ekspresyon sa kabubut-on sa probinsya, nga nagpakita sa kahimtang sa lokal nga sentimyento batok sa maong isyu.
Ang maong pamahayag naghatag og hulagway sa papel sa mga representante sa Kongreso nga magdala sa tingog sa katawhan ngadto sa nasyonal nga diskurso, samtang nagpabilin nga sensitibo sa pulso sa komunidad nga iyang gi-alagaran.
