BUTUAN CITY – Bukas hangtud ugmang adlawa, Dominggo Oktubre 3, ang Commission on Elections kon COMELEC-Butuan aron mu-cater sa mga Butuanon nga gustong mag-file sa ilang certificate of candidacy kon COC alang sa May 2022 local elections.
Sa eksklusibong pakighinabi sa Bombo Radyo Butuan, gipadayag ni city election officer Atty. Samuel Rollo nga sa unang adlaw sa COC filing kagahapon, wala pa’y nakadalikyat sa ilang buhatan dungan sa panghinaut nga duna na’y maka-file karong adlawa. Gipadayag sa opisyal nga abli sila gikan sa alas-otso sa buntag ngadto na sa alas-singko sa hapon.
Tungod kay na-andan matud pa nga adto na magkara-kara pagduso sa ilang COC sa 11th hour, giklaro sa opisyal nga andam gihapon nila kining atimanon tungod kay katungod man sa matag-mukandidato kung hangtud kanus-a nila gustong mudalikyat sa ilang buhatan. Wala matud pa’y angayang kabalak-an sa seguridad tungod kay duna’y gi-deploy nga mga pulis sukad pa kagahapon aron magbantay sa palibot sa COMELEC office.
Apil sa trabaho sa mga pulis ang pagkontrola sa mga tawo aron masigurong mamintina ang mga health protocols.
Aron dili kaayo sila magdugay sa ilang pagduso sa COC, gi-awhag ni Atty. Rollo ang mga mukandidato nga kompletuhon na daan ang mga rekisitos ug fil-apan ug tarong ang ilang COC form nga mahimong ma-download sa ilang website.
Alayon niini, nanawagan si Atty. Rollo ngadto sa tanang nagplanong mukandidato nga sundon lang ang mga rekisitos ug mihangyo nga dili na magdala og daghang escorts tungod kay dili gihapon sila makasulod sa ilang buhatan tungod sa gisunod nga protocols aron malikayan ang tinakdanay sa COVID-19.
Ang mingaw nga sitwasyon sa COMELEC-Butuan, susama usab kamingaw sa may Agusan del Norte Capitol covered court nga maoy gigamit sa COMELEC provincial office alang niadtong magduso sa ilang COC.
Duna usa’y mga personaheng nag-man sa maong venue uban ang pipila ka mga pulis nga maoy mag-secure sa area.
