BUTUAN CITY– Gipasigarbo sa buhatan sa COMELEC Butuan human nga malampusong nahuman na ang extended nga rehistrasyon sa mga botante taliwala pa man sa pagdagsa sa mga gustong magparehistro sa besperas sa rehistrasyon hangtod sa natapos kagahapong adlawa.
Sa eksklusibong pakighinabi ning sibyahan kang Butuan City Election Officer Atty. Samuel Rollo, gibutyag niini nga mapasalamaton sila ning higayuna tungod kay nahimong positibo gyud ang gihimong paglugway sa rehistrasyon hinungdan nga bisan og midagsa man ang tao sa SM Mall Butuan apan walay nagmahay human nga na-cater nila ang tanang aplikante.
Tungod niini, plano sa buhatan nga sunod semana, andamon na usab nila ang mga presinto nga gamiton alang sa sunod tuig nga eleksyon ilabina nga daghang mga patakaran ang angay sundon tungod sa kasamtangang sitwasyon karun sa kalibutan.
Sumala niini nga dako gyud ang mahimong kausaban nga mahitabo sa eleksyon tungod kay mahimong kunhuran na ang ihap sa mga botante nga musulod sa matag presinto apan tas-an ang voting hours sa mga niini nga buot pasabot, posibleng mudaghan ang clustered precincts ning higayuna.
Tumong niini nga masunod gyud ang gipatuman gihapon nga health protocols. Samtang andam na usab matud pa ang ilang BI nga maoy mag assist sa nasangpit nga umalabot nga eleksyon pinaagi sa abag sa Dep-Ed.
Gipahinumdo usab ni Atty Rollo ngadto sa tanang katawhan ning syudad nga kung wala pa makaparehistro, dili na gyud sila modawat sa ilang buhatan og aplikante tungod kay human na ang pipila ka semana nga extension sa voter’s registration nga gitagana sa COMELEC alang niadtong gustong muparehistro.
Tungod niini, dili na matud pa magsayang og panahon sa pag adto sa ilang opisina ug maghulat na lamang sa sunod nga rehistrasyon sunod tuig pagkahuman sa eleksyon.
