BUTUAN CITY – Gikumpirma ni Dr. Ernesto Pareja, medical officer IV sa Department of Health kon DOH-Caraga nga duna na sila’y natalang clustering kon inanay nga pagsaka sa mga kaso sa COVID-19 ning rehiyon ilabina dinhi sa dakbayan sa Butuan.
Sa eksklusibong pakighinabi sa Bombo Radyo Butuan, gipadayag sa opisyal nga kada-adlaw duna na’y matalang COVID-19 positive cases gikan sa nagkada-iyang lalawigan ning rehiyon tungod matud pa sa nagkahinay na nga immunity sa mga tawo hatud sa taud-taud na nilang pagpatupok sa primary series ug wala na nagpa-booster shot pa.
Nagkadaghan na matud pa ang nagpositibo tungod sa kadaghan na usab sa mga wala misunod sa health protocols sama sa pagsuot og face mask ug paglikay sa panagtapok-tapok.
Kasagaran usab sa mga nagpositibo mga dili bakunado nga dihang na-igo sa COVID-19, nagpakita og moderate ngdto sa severe nga simtomas sa maong sakit sukwahi sa mga bakunado nga diha lang kutob sa pagpakita og mild symptoms.
Tungod niini, gipanawagan ni Dr. Pareja ang tanan nga magpa-booster na aron madugangan ang ilang proteksyon batuk sa makamatay nga coronavirus.
Samtang sa mga bakunang hapit na mu-expire, gipadayag ni Dr. Pareja nga ila kining gi-allocate ngadto sa mga lugar ning rehiyon nga paspas ang pagpamakuna aron lang dili kini ma-abtan sa expiry date.
