BUTUAN CITY – Wala pa’y tubag ang China sa awhag sa World Health Organization nga i-share ang data sa mga gigikanan sa Covid pandemic, lima ka tuig human kini nagsugod sa Wuhan City sa rasong usa kini ka moral ug scientific imperative. Gipadayag kini sa WHO subay sa gitawag nilang “milestone” anniversary sa makamatay nga sakit.
Sigon sa WHO, kung wala’y transparensiya, pagpa-ambit ug kooperasyon tali sa mga nasud, wala’y katakos ang kalibutan nga likayan ug pangandaman ang umalabot nga mga epidemya ug pandemya.
Daghan sa mga scientists ang nagtuo nga ang virus mibalhin sa natural nga paagi gikan sa mga mananap ngadto na sa mga tawo apan duna usa’y nagtuo nga gikan kini sa usa ka laboratoryo sa Wuhan kansa una nang gipanghimakak sa China.
Niadtong Septembre, usa ka grupo sa mga scientists ang nagbutyag nga beyond reasonable doubt na nga ang COVID-19 pandemic nagsugod sa mga infected nga mga mananap nga gipamaligya sa kamerkaduhan inay nga gikan sa laboratory leak. Nakab-ot nila kini nga conclusion human gi-analisa ang gatusang mga samples nga nakolekta gikan sa Wuhan niadtong Enero, tuig 2020.
