BUTUAN CITY- Gi-insistar sa suspended Senate Sergeant-at-Arms nga si Mao Aplasca nga “spliced” o gisumpay-sumpay matud pa ang CCTV footage nga gipagawas kalabot sa insidente sa pagpamusil sulod sa Senado niadtong Mayo 13, 2026.
Sa ambush interview niadtong Miyerkules, sigon ni Aplasca piling parte lamang matud pa sa video ang gipagawas aron suportahan ang usa ka partikular nga naratibo.
Gipasi-ugda usab niini nga dili matud pa tinuod ang mga pamahayag nga walay nahitabong pag-atake sa Senado.
Samtang, sigon usab ni Aplasca nga gilaoman na niini ang posibleng pagpasaka og kaso batok niini kalabot sa insidente.
Una nang girekomenda sa Philippine National Police (PNP) ang pagpasaka og kaso batok kang Aplasca ug duha pa ka security personnel sa Senado kalabot sa nahitabong pagpamusil sulod sa Senado.
Sumala sa PNP, posibleng mag-atubang sa paglapas sa Rules of Engagement ug sa mga probisyon sa Republic Act No. 11917 o Private Security Services Industry Act ang mga nalambigit.
Gikomperma usab ni Aplasca nga nakadawat na sila og subpoena gikan sa PNP-Criminal Investigation and Detection Group isip parte sa gihimong imbestigasyon.
Apan, iyang gihimakak ang pasangil nga aduna silay gitagoang mga ebidensya sama sa CCTV footage ug mga pusil.
Sigon usab ni Aplasca nga adunay security coordination meeting tali sa Office of the Senate Sergeant-at-Arms ug GSIS Security Office niadtong Mayo 12 isip pagpangandam matud pa sa nagkaduol nga impeachment proceedings.
