BUTUAN CITY – Nakatala na usab og 39 ka mga bag-ong kaso sa COVID-19 ang Caraga Region nga gilangkuban sa 22 ka mga lalaki ug 17 ka mga babaye kondiin 74-porsiento ang anaa sa edad nga 11 ngadto sa 40-anyos.
Sa mga bag-ong kaso, 13 ka mga kaso ang natala sa Agusan del Sur nga nabahin sa mga lungsod sa Prosperidad ug San Luis nga mitala og tag-lima, 2 sa San Francisco ug usa usab sa Trento samtang usa ka kaso ang natala sa Brgy. Taglatawan, Bayugan City sa susamang lalawigan.
Nakatala usab og usa ka kaso ang lungsod sa Claver, Surigao del Norte; 3 sa Surigao del Sur nga gikan sa lungsod sa Lingig-2 ug usa sa Cantilan ug pinakadaghang natala dinhi sa dakbayan sa Butuan kondiin 9 ka mga kaso ang natala sa Brgy. Bancasi, 6 sa Libertad, 3 sa Villa Kananga, 2 sa Lapu-Lapu ug usa sa Baan. Km 3.
Ang tanang bag-ong kaso, gi-quarantine na, gi-monitor ug gi-atiman sa nagkada-iyang mga quarantine facilities.
Sa pagkakaron, anaa na sa 3,499 ka mga kumpirmadong kaso dinhi sa Caraga Region kondiin 444 niini ang mga aktibong kaso, 2,891 na ang nakarekober samtang 164 gihapon ang natalang patay human nga wala na’y natalang bag-ong patay.
