BUTUAN CITY – Gipanghimakak ni Michael Jibson Hernandez, vice president sa Philippine Health Insurance Corporation kon PhilHealth-Caraga ang nanggawas nga impormasyong dili na accredited sa ilang ahensya ang Butuan Doctor’s Hospital kon BDH rason nga wala’y angayang kabalak-an ang mga pasyenteng naka-confine karon sa maong ospital.
Sa eksklusibong pakighinabi sa Bombo Radyo Butuan, gipadayag ni Hernandez nga ning mi-aging tuig 2021, nakabayad na sila sa mga claims sa maong ospital og kapin 32-milyunes pesos ug padayon usab nilang giproseso ang uban pa nilang mga claims.
Sigon ni Hernandez, wala sila’y nadawat nga letter of denial o kaha letter of suspension gikan sa ilang sentrong buhatan alang sa mga claims sa maong ospital rason nga padayon ang ilang pagproseso niini alang sa ilang mga pasyente.
Aron matud pa maklaro ang maong isyu ug dili mabalaka ang mga pasyente apil na ang magpa-admit pa sa Butuan Doctor’s Hospital, nagpagawas na siya og advisory No. 2022-001 kondiin nakalatid dinhi ang padayong pag-avail sa mga pasyente sa mga benepisyong gihatag sa maong balay-tambalanan.
