BUTUAN CITY – Padayon karung gihashasan o gi-validate ang muabot sa 22,700 ka mga mag-uuma sa Butuan City nga narehistro sa Registry System for Basic Sectors in Agriculture kon RSBSA.
Kini aron makuha ang validated og pinal nga ihap nga maoy e-endorso ngadto sa Department of Agriculture kon DA-Caraga alang unya sa ihatag nga assistance nonot usab sa nasinatiang grabe kataas nga presyo sa produktong lana.
Sigon ni Engr. Pierre Anthony Joven, ang City Agriculturist og Head sa City Agriculture and Veterinary Department ning siyudad sa Butuan laumang karun nga semana mahatag na nila ang pinal nga listahan samtang ang fuel subsidy laumang mahatag sunod bulan bisan og wala pay kumpirmasyon gikan sa central office.
Gawas niini, padayon usab ang paghatag sa city government og certification ngadto sa mga mag-uuma nga dunay makinaryas sama sa harvester og tractor aron magamit nila nga makatubil og 100 litros kada transaction sa gasolinahan.
Kini may kalabutan sa mulo sa mga mag-uuma nga gilimitahan lang sila sa ilang itubil dinha sa gasolinahan.
Samtang gibutyag sa opisyal nga bisan sa kamahal sa gasolina, duna gihapoy angayan nga ipasalamat ang mag-uuma tungod kay mahal man ang presyo sa humay nga miabot og 24 pesos ngadto sa 27 pesos matag kilo sa nakalabay nga semana.
Isip pagpalig-on sa seguridad sa pagkaon, gitahasan ang ilang departamento nga ibalik ang programang Gulay sa Panimalay nga gihimo niadtong panahon sa Covid.
Alayon niini, nagsugod na sila og re-pack sa seedling dayung awhag sa mga residente nga mobisita sa ilang opisina og ipakita ang pruweba nga andam na ang tamnanan, aron usab makakuha sa libreng liso.
Suportahan usab nila ang barangay sa pagbuhat og vegetables seedling nursery aron pwede nang makakuha didto ang ilang mga konstituwente.
