BUTUAN CITY – Hugot nga gikondena sa Police Regional Office kon PRO-13 ang brutal nga pagpatay sa rebeldeng grupong New People’s Army kon NPA ngadto sa usa ka mag-uuma ning mi-aging alas 6:00 sa gabie sa bukirang bahin sa Kabanikagan, Brgy. Hinimbangan, lungsod sa Kitcharao, Agusan del Norte.
Naila ang biktimang si Roy Olmo Biyog, 23-anyos, duna’y kaipon, mag-uuma ug residente sa Camp Eduard. Alegria, Surigao del Norte.
Sa pakighinabi ning sibyahan kang Police Senior Master Sergent Zena Panaligan, sa Public Information Office sa PRO-13, gibutyag niini nga hugot nilang gikondena ang dili makatawhanon nga buhat sa NPA diin walay kalooy niini nga gipatay ang biktima tungod lang sa walay kamatooran nga alegasyon.
Nasayran nga igo lang namusil og baboy-ihalas ang biktima kauban ang iyang mga higala dihang na-abtan sa 5 ka armadong lalaki nga gitoohang miyembro sa NPA.
Gidakop ang biktima og gigapos dayung gi-alegahan nga kini ang asset sa militar adiser gipusil sa makadaghang higayon samtang nakasibat ang iyang ka-uban.
Gi-ila usab sa nakasibat nga kaubanan sa biktima ang usa sa mga armado nga si Roy Forteza Samonte alyas Dark nga gituohang myembro sa Guerilla Front Committee 16A.
Gikumpirma usab ni Panaligan nga nagpasaka na og kaso ngadto sa Kitcharao MUnicipal Police Station ang pamilya sa biktima.
