BUTUAN CITY – Wala’y ka-usaban sa eskedyol sa biyahe sa mga bus units sa Bachelor Express Incorporated kon BEI s hangtud sa Biernes Santo.
Base kini sa pagkumpirma ni Angelito Vasquez sa eksklusibong pakighinabi sa Bombo Radyo Butuan subay na usab sa pagdasok na karon sa mga pasahero sa nagkada-iyang terminal ilabina sa Langihan Premium Bus Terminal aron manguli sa ilang tagsa-tagsa ka mga lugar.
Sigon ni Vasquez, ang ilang mga biyahe sa entiro Caraga region ug ubang bahin sa Mindanao, maintain lang gikan sa first hangtud sa last trip.
Sama na lang sa ilang mga biyahe padulong sa Cagayan de Oro City pabalik ning siyudad ug vice versa diin 24-oras nga duna’y mga magdagang yunit samtang sa rutang Surigao City ug vice versa, magsugod kini sa ala-una sa kaadlawon hangtud sa alas-nueve sa gabii samtang ala-una sa kaadlawon hangtud sa alas-sais sa gabii usab sa Tandag City ug vice versa.
Samtang sa Mangagoy sa Bislig City gikan sa ala-una sa kaadlawon ngadto na sa alas-2:30 sa hapon samtang ang padulong sa Las Nieves, Agusan del Norte gikan sa alas-sais sa buntag ngadto na sa alas-sais sa gabii susama sa San Luis, Agusan del Sur.
Aminado si Vasquez nga lahi na ng sakay sa mga pasahero karon kumpara sa mi-aging mga Semana Santa ug kini tungod matud pa sa bagyong Agaton nga naka-apekto sa pipila ka parte sa Caraga ilabina sa Surigao provinces.
Kini ilabina nga pangitaan nila og vaccination card ang mga pasahero.
Samtang wala na’y biyahe karong Biernes Santo ang mga bus units sa Davao Metro Shuttle gikan ning siyudad sa Butuan padulong sa Davao City ug vice versa isip pagtamod sa pagkamatay ni Hesu Kristo subay sa pagbalaan sa Semana Santa.
Sa eksklusibong pakighinabi sa Bombo Radyo Butuan, gipadayag ni Danny Garnota nga mubalik ang biyahe sa ilang mga yunit sa Sabado de Gloria nga magsunod gihapon sa susamang oras gikan sa alas-4:40 sa kaadlawon ang first trip ug alas-11:40 sa gabii usab ang last trip.
Dugang ni Garnota, wala’y angayang kabalak-an ang mga pasahero tungod kay wala’y pagsaka ang ilang plitehan ug nagsubay ra gihapon kini sa fare matrix nga gitugot sa Land Transportation, franchising and regulatory Board kon LTFRB.
