BUTUAN CITY – Dungan nga gibuksan ning adlawa sa Land Transportation, Franchising and Regulatory Board kon LTFRB-Caraga ang inter-regional travel gikan sa pipila ka mga siyudad ning rehiyon ngadto na sa Cagayan de Oro City ug Davao City.
Sa eksklusibong pakighinabi sa Bombo Radyo Butuan, gipadayag ni LTFRB-Caraga OIC regional director Ma. Kristina Cassion nga apil niini ang mga siyudad sa Butuan, Surigao ug Tandag padulong sa maong mga siyudad ug vice versa.
Gibutyag sa opisyal nga dapat niadto ra unta kining Agusto 1 gibuksan nga mga biyahe apan ilang gisibog human mihangyo ang lokal nga kagamhanan sa Butuan tungod kay dili pa andam niadtong tungora ang mga holding facilities ning siyudad apil na ang ilang mga personahe ug ang mga barangay holding facilities.
Sa pagkakaron, tag-duha ka round trips nga biyahe lang una ang ma-cater sa matag-end point kon gikan sa siyudad nga gigikanan sa mga bus units sa Bachelor Express Inc. padulong ngadto sa ilang tagsa-tagsa ka destinasyon ug vice versa.
Kini tungod kay gitun-an pa ang mamahimong dagan sa nasangpit nga inter-regional trip uban sa ilang tinguha nga magdagan ang mga bus nga wala’y sulod nga pasahero.
Sa pagkakaron, mga adlaw’ng Martes, Huwebes ug Sabado pa lang ang duna’y biyahe alang sa inter-regional trip.
Higayong maklaro na ang demand sa biyahe sa mga bus pinaagi sa gidaghanon sa mga pasahero, posibleng dugangan na nila ang ihap sa pabiyahi-ong mga bus units.
Kini ilabina og andam na ang mga barangay holding facilities diin i-drop ang mga pasahero aron didto atimanon sa mga health workers nga maoy mususi sa ilang body temperature, mukuha kanila og rapid test ug uban pang kinahanglan nilang agi-an.
