BUTUAN CITY- Gikomperma ni PLtCol. Jerry Alvarez, Deputy Provincial Director for Operation, nga naila na ang mga biktima sa nahagsa nga Cessna 182 Skylane nga adunay registered number nga RP-C2444 sa Dinagat Island. Sigon pa niini nga ang mga biktima mao sila si Captain Jose Antonio Ortoll, 50 anyos, ug ang iyang nag-inusarang pasahero nga si Denis Villar de Castro, 50 anyos usab, kansa parehong residente sa 31 Juan Luna, San Lorenzo Village, Makati City.
Sumala sa asoy ni Alvarez, niadtong Abril 8, 2026, sa may ala una sa hapon, nakadawat og tawag ang Police Provincial Office gikan sa Sayak Airport sa Del Carmen, Siargao, mahitungod sa giingong nawala nga aircraft sulod sa ilang Area of Responsibility. Tungod niini, gilayon nga minghimo og search and rescue operation ubos sa liderati ni Provincial Director PCol. Jerome Dela Cruz, uban ang pakigtambayayong sa Bureau of Fire Protection, Philippine Coast Guard, ug uban pang ahensya sa Navarro, Tubajon, Dinagat Islands.
Dugang pa ni PLtCol. Alvarez, gi-terminate usab niadtong Abril 10 sa alas 4 sa hapon ang Joint Retrieval Operation sa Provincial Disaster Risk Reduction and Management Council kon PDRRMC, Tubajon Municipal Police Station, PGC, Philippine Army, BFP, MDRRMO of Tubajon ug sa Barangay Volunteers tungod sa verbal request gikan sa mga hingtungdang pamilya sa mga biktima.
Samtang gi-hangyo usab matud pa sa pamilya sa mga biktima nga i-cremate nalang ang mga narekober nga mga body remains ingon man ang pagtabon sa area diin asa nahagsa ang maong eroplano inay nga magpadayon ang maong operation. Gibutyag usab ni Alvarez, nga ang mga biktima padulong sa Subik, Siargao aron magbakasyon. Gani, giawhag usab niini ang publiko nga i-delete ang mga video ug mga hulagway nga nagpakita og sensitibong detalye diin nagkatag sa social media mahinungod sa pagkahagsa sa cessna plane sa Dinagat Islands base na usab sa hangyo sa mag pamilya.
