BUTUAN CITY- Nagpasaka og kaso si kanhi U.S. President Joe Biden batok sa U.S. Department of Justice kon DOJ aron pugngan ang planong pagpagawas og audio recordings ug transcripts sa ilang private talks sa iyang videographer niadtong 2016 ug 2017.
Sumala sa reklamo nga gipasaka sa federal court sa Washington, D.C., gikatakdang ipagawas sa DOJ sa Hunyo 15 ang maong mga materyales sa U.S. House Judiciary Committee ug sa conservative group nga Heritage Foundation.
Ang nasangpit nga grupo minghangyo og mga dokumento isip aprte sa impormasyong gigamit sa imbestigasyon ni kanhi Special Counsel Robert Hur niadtong 2023 kalabot sa pagkupot ni Biden og classified documents.
Gi-insistar sa demanda, nga gi-abosaran matud pa ang proseso nga request sa komite aron malikayan ang mga probisyon sa Freedom of Information Act kansa naglimita sa pagpagawas sa maong impormasyon.
Gihangyo sa kampo ni Biden sa korte nga ideklarang ”not valid” ug “pretextual” ang request sa komite ug hugot nga ibawal ang pagpagawas sa mga recording.
Samtang, sigon sa usa ka tigpamaba sa DOJ nga gusto matud pa sa ahensya nga ipagawas ang mga recording aron makita sa publiko ang unod niini, nga gi-ingong nagpakita og kondisyon sa panghuna-huna sa kanhi Presidente.
Hugot usab nga gilimod sa kampo ni Biden ang maong mga alegasyon.
Sigon ni TJ Ducklo, spokesperson ni Biden, nga nakigkoordinar na ang kanhi Presidente sa imbestigasyon ni Hur, ug gi-insistar nga kini dili lamang usa ka butang sa transparency apan lakip usab sa politika.
Una nang gitugotan sa korte si Biden nga mangilabot sa kaso sa Heritage Foundation batok sa DOJ, apan wala kini gitugotan nga kwestyonon ang request sa U.S. House Judiciary Committee.
