BUTUAN CITY- Gimando sa International Criminal Court (ICC) ang laeng pagsusi sa kahimsog ni kanhi President Rodrigo Duterte aron masuta kung kaya niining mo-atubang sa pagataral kalabot sa gi-atubang niini nga kasong crimes against humanity.
Sa gihimong unang status conference niadtong Miyerkules, sigon ni ICC Trial Chamber III Judge Joanna Korner, nga susigon pag-usab sa mga eksperto ang kahimtang ni Duterte human magpasaka og mosyon ang kampo niini.
Sumala sa depensa, ang maong medical assessment alang lang sa confirmation of charges proceedings ug dili alang sa pagtaral.
Sigon ni Korner nga posibleng i-mando gilayon sa korte ang laeng pagsusi aron makakuha og updated nga balita kalabot sa kahimsug sa kanhi Presidente.
Tungod niini, gipostpone una sa ICC ang pagtakda og eksaktong petsa sa pagsugod sa pagtaral. Sumala ni Korner, impiortanteng mahibaloan una ang tinuod nga kondisyon ni Duterte hilabi na nga adunay kalabotan kini sa iyang edad ug posibleng mga problemang medikal.
Gihisgutan usab sa status conference ang uban pang hisgutanan kalabot sa kaso sama sa pretrial deadlines, pagsumite og ebidensya, mga dialect nga gamiton sa pagtaral, ug disclosure obligations sa matag kampo.
Sumala sa Korte, gusto sa ICC Prosecution nga sugdan ang pagtaral sa Nobyembre 30, samtang gusto usab sa legal representative sa mga biktima nga sugdan kini sa Setyembre.
Samtang, gisugyot sa ICC Registry nga sa Enero 2027 nalang sugdan ang trial tungod sa mga hisgutanang adunay kalabotan sa interpretation o paghubad sa pinulongan.
Sa, pagkakaron wala pay gipagawas nga final schedule ang ICC samtang gihuwatan ang resulta sa bag-ong medical examination ni Duterte.
