BUTUAN CITY – Aminado si Baguio City Mayor Benjamin Magalong nga nakuratan siya sa iyang mga nadiskubrehan sulod lang sa pipila ka adlaw niyang pagserbisyo sa Independent Commission for Infrastructure kon ICI.
Sa eksklusibong pakighinabi sa Bombo Radyo Philippines, gipadayag ni Mayor Magalong nga gila-uman na niyang daan ang kalapad sa natigayong kurapsyon sa gobyerno apan ang iyang gikakurat og maayo mao ang intensity kon kalawom na sa kurapsyon nga gihimo nang livelihood program sa mga hiwi nga opisyal sa gobyerno hinungdan nga dili na makonsiderang pinasahi.
Tungod sa grabe nga kurapsyon, bana-bana ni Mayor Magalong, kapin na sa usa ka libo ka proyekto ang napahimuslan sa kurakot nga mga opisyal sa gobyerno. Dinhi matud pa niya nakita nga wala na gilantaw sa maong mga hingtungdang opisyal ang interest sa publiko kondili ang ila na lang kaugalingong mga interest nga makasapi.
Wala na matud pa niya nakita ang panultihon nga ang matag-piso, kinahanglang idapat alang sa kaayuhan sa publiko tungod kay mas gi-una niya ang ilang makuha nga kita alang sa ilang bulsa.
Dugang pa ni Magalong, sa ila matud pang paglibot ni Department of Public Works and Highways kon DPWH Sec Vince Dizon, wala sila’y nakitang bisan usa lang ka proyekto nga maayo ang pagkahimo tungod kay ang tanan substandard samtang daghan usab wala pa napabarog taliwa nga nadeklara na kining completed.
Makadismaya matud pa ang panagkunsabo sa mga opisyal sa gobyerno ug mga contractors aron lang makuha ang dakong bulto sa kwartang gitagana sa gobyerno alang sa mga proyektong ikaayo sa katawhang Filipino.
Posible matud pang nahimo na lang normal kini tungod kat ang tanan, nabayran og kwarta apil na ang mga tawo atol sa ilang pagbotar.
CHENG –Aminado usab si Mayor Magalong nga duna siya’y naligsan sa sunod-sunod nga imbestigasyong iyang gihimo dihang parte pa siya sa Independent Commission for Infrastructure kon ICI.
Dili matud pa malimod nga duna’y mga impluwensyadong naligsan sa sunod-sunod nga inspeksyong ilang gihimo sa mga flood control projects, taliwa nga pila ka adlaw pa lang siya sa komisyon human gitudlong imbestigador ug special adviser.
Wala usab niini pasaylua nga birahan ang Malakanyang human gipadungog-dungog nga kurakot matud pa siya tungod sa tennis court project sa ilang siyudad.
Dawat matud pa niya nga gitangtangan siya og posisyong imbestigador sa maong komisyon apan ang dili niya madawat, mao nga bahiran ang iyang kaugalingon og isyung kurapyon nga maoy dugay na kaayo niyang gibarugan aron mahunong na ug patubagon ang mga opisyal sa gobyernong nalambigit niini.
