BUTUAN CITY – Desidido ang kadumalahan sa City Environment and Natural Resources Office ning siyudad sa Butuan nga ipadayun ang pagmugna og Barangay bantay kahinlo brigades Volunteer aron masumpo ang pataka ug labay sa basura.
Sigon ni Forester Ivan Saburao, Office-In-Charge sa City ENRO nga niadto pang 2017 gimugna ang Barangay bantay kahinlo brigades Volunteer pinaagi sa gi-isyu Executive order number 191 ni Butuan City Ronnie Vicente Lagnada sa tuig 2016. Nahunong matud pa kini human sa election diin dunay bag-ong mga kapitan nga nakalingkod samtang nabungkag usab ang grupo.
Gi-activate kini sa karun tungod sa nagkatag nga basura nga gipanglabay bisan asa dinhe sa dakbayan. Sa nakalabay nga semana sa dihang gihimo ang seminar pag-deputized sa mga indibidwal aron pwede nang maka-isyu og ticket isip penalty sa masakpang ilegal nga naglabay sa basura.
Sumala sa opisyal nga dalion niini ang proseso aron makasugod na sa pag-isyu og ticket ang deputized individual.
Aron ma-engganyo kini nga mag-isyu ug ticket, sa matag mobayad sa penalty, dunay 25 porsiento niini nga share. Gibutyag sa opisyal nga ang penalty sa illegal dumping alang sa unang kalapasan nagkantidad og dos mil pesos, 3-mil pesos usab sa ikaduhang paglapas og 5-mil pesos sa ikatulong kalapasan. Apan ugaling masuta nga ang gilabay nga basura dunay sagol nga hazardous waste, otomatikong mokantidad sa 5-mil pesos ang penalty niini.
