-- ADVERTISEMENT --
BUTUAN CITY – Gi-andam na ni Atty. Manases Carpio, bana ni Vice President Sara Duterte, ang pagsang-at og kasong kriminal batuk sa pipila ka opisyal sa Bangko Sentral ng Pilipinas (BSP), Anti-Money Laundering Council (AMLC), ug pipila ka kongresista sa Quezon City Prosecutor’s Office sa karung adlawa, Abril 27, 2026.
Lakip sa mga gireklamo sila BSP Governor Eli Remolona Jr., AMLC Executive Director Ronel Buenaventura, ug pipila ka miyembro sa Kamara sama nila House Committee on Justice Chair Gerville Luistro, Percival Cendaña, Chel Diokno sa Akbayan Party-List ug Mamamayang Liberal Party-List Leila de Lima.
Base matud pa kini sa paglapas sa Anti-Money Laundering Act, Bank Secrecy Law, ug Data Privacy Act tungod sa pagpagawas sa sensitibong banking records.
Kini alayon sa pagtaho-ulat sa AMLC sa Kamara de Representantes nga dunay halos 6.77 bilyones pesos nga “suspicious” ug “covered” transactions nga konektado nila Vice President Sara Duterte ug Carpio sulod sa halos duha ka dekada.
Sumala sa AMLC, lakip niini ang bilyones nga misulod ug migawas sa ilang mga account, samtang dunay parte usab nga dili matumbok sa karaang sistema.
Pamugos pa ni Carpio, ilegal ang matud pa pagpagawas sa mga rekord ug gigamit kini para sa “black propaganda” batuk sa pamilya Duterte, ilabina taliwa sa mga isyung politikal ug impeachment proceedings.
Sigon pa niini nga protektado sa balaod ang bank records ug dili kini dapat ipakita.
Hugot usab nga ginegar sa pipila ka magbabalaod ang alegasyon. Sumala nila De Lima ug Cendaña, sakop sa gahum sa Kamara ang pagdungog sa impeachment ug dili kini paglapas sa bank secrecy laws.
Kabahin matud pa kini sa accountability process ug dunay legal nga basehan ang paghisgut sa mga financial transaction kung dunay isyu sa posibleng anomalya.
