BUTUAN CITY – Nagmalampuson ang “Oplan Ainah” sa Philippine Drug Enforcement Agency kon PDEA Caraga kagahapon sa alas-5:05 ang takna sa hapon sa may P-8 Brgy. Limaha ning dakbayan sa Butuan.
Kini human nakuha gikan sa posisyon sa target nga pusher/user ug High Value Individual sa Caraga nga si Ainah Casan Sultan alyas Ainah, 29-anyos, dalaga, walay trabaho ug residente sa P-11, Brgy. Ong Yiu, ning siyudad.
Kauban nga nasikop sa Regional Priority Target nga si Ainah si Mark James Burdeos Sequilla, 30 anyos, ulitawo, drayber ug residente sa P-4, Del Pilar, Brgy. Datu Silingan ning syudad human sila napalitan sa poseur-buyer og usa ka pakete sa gitu-uhang shabu atol sa maong drug buy bust operation.
Nakuha sa position ni Ainah ang usa ka gamay ug usa ka dako nga pakete sa gitu-uhang shabu, 2-mil pesos nga marked money kondiin usa niini ang boodle money, usa ka touch screen cellphone ingon man 150-pesos nga salaping cash.
Mitimbang og 5-gramo ang nakuha nga shabu kanila nga mukantidad og 30,000 pesos.
Gi-andam na sa kapulisan ang kasong paglapas sa sections 5 ug 11 sa Article. II Republic Act 9165 nga ipasaka batuk sa mga suspetsado.
