BUTUAN CITY – Tumang kalipay usab ang gibati sa mga area winners sa grand draw sa Buena Mano Salvo Year 17 promo human nila nakuha ang ndag-an nilang ganti kaganinang buntag.
Sama kang Maria Dolalas sa Purok 2, Brgy. Taguibo ning siyudad nga maoy ikatulong mananaog alang sa 5-mil pisos nga salaping cash.
Sumala ni Dolalas, dako na kaayo kining tabang nga kantidad aron makapahimo na siya og tangkal sa manok alang sa iyang negosyo apil na sa konsumo.
Nagpasalamat siya sa Kahitas-an sa kada-ugang gihatag ngadto kaniya ilabina nga kini ang unang higayon nga mi-apil siya sa promo sa Bombo Radyo ug swerte pang nahimong grand draw winner.
Susamang kalipay usab ang gibati ni Mennen Angco sa Purok 5-B, Brgy. Antongalon ning siyudad ilabina nga sa ikapito ka semana na duration sa promo ug sa grand draw siya naghulog og mga entries ug swerte kaayo nga maoy nabunot alang sa 10-mil pisos nga ikaduhang area winner.
Gamiton matud pa niya ang iyang nadag-ang ganti sa pagpa-enrol sa duha niya ka mga anak ug magbalik-halad usab siya sa Ginoo nga maoy iyang hugot nga gipasalamatan.
Samtang dakong tabang usab gihapon alang kang Romeo Samontina sa Purok 4, Brgy. Buhangin ning siyudad sa Butuan ang iyang pagkabunot isip unang ganti alang sa 15-mil pisos tungod kay duna na siya’y magamit pangpalit sa maintenance nga tambal alang sa ilang duha sa iyang asawa.
