BUTUAN CITY – Suspendido na usab og usa ka tuig si Butuan City, Brgy. Ampayon Kapitan Rodencio Basubas Jr., human kini nakabalik og lingkod sa iyang pwesto niadtong Martes, Marso 8, sunod ang sunod-sunod nga suspensyong gipahamtang kaniya sa Sangguniang Panlungsod.
Sa eksklusibong pakighinabi sa Bombo Radyo Butuan, giklaro ni Kapitan Basubas nga iyang nadawat kagahapon ang duha ka resolusyon sa city council nga nagtakda sa sunod-sunod na usab nga tag-unom ka buwang suspensyon kansa alang kaniya, grabe na nga paglutos sa city government sa ilang barangay ug sa mismong katawhan tungod kay siya man ang amahan sa Brgy. Ampayon.
Gipasabot sa kapitan nga ang iyang suspensyon susama ra og ground sa mi-agi niyang mga suspensyon kalabot matud pa sa yuta sa pamilya Briones kansa ang kanhi kapitan matud pa sa ilang barangay nga si Felix Gonzaga ang nakig-transact niini.
Ang maong ground kansa mao usa’y gihimong basehan sa pagpasaka batuk kaniya og kasong estafa, dugay nang gibasura sa korte tungod sa kawala’y lig-ong ebidensya.
Tungod sa balik-balik nga isyu, gihagit na ni Kapitan Basubas si City Councilor Rema Burdeos, chairwoman sa Committee on Good Government sa Sangguniang Panlungsod, nga debatihan nila kini nga isyu aron ang katawhan na sa ilang barangay ang maghukom kung unsa ka dakong binuang ang maong suspensyon.
Samtang dili matud pa mapatuman ning panahuna ang usa ka tuig nga suspensyon nga gipahamtang sa Butuan City Council ngadto kang Ampayon Brgy. Kapitan Rodencio Basubas Jr. tungod kay election period na.
Sa eksklusibong pakighinabi sa Bombo Radyo Butuan, gipadayag ni Atty.Ronel Azarcon, ang manlalaban ni Kapitan Basubas, nakalatid kini sa Omnibus Election Code kondiin karong tuiga, nagsugod ang election period sa Enero 10 ug matapos sa Hunyo 9.
Apan aminado si Atty. Azarcon nga duna’y exemption niini, kana kung otorisado sa Commission on Elections kon COMELEC ang suspensyon.
Gawas niini, ang Local Government Code sa nasud nagbutyag usab nga kung duna’y nagtunhay nga suspensyon, otomatiko na kining tangtangon sulod sa 90 ka mga adlaw adiser ang eleksyon.
