BUTUAN CITY – Giangkon sa kadumalahan sa Bancasi-Pinamanculan Single Motor Drivers Association nga nagpa-usbaw sila og 5 pesos sa ilang plitihan.
Ang maong grupo nahimutang sa Crossing Bancasi-Pinamanculan ning siyudad sa Butuan og nagbiyahe sa Barangay Pinamanculan.
Sumala pa sa ilang besi presidente nga si Cecerio Toner, nga dili na gayud makaya ang kamahal sa gasolina nga kung dili sila magpa-usbaw og 5 pesos matabla-tabal ra ang ilang kita.
Ratsada na matud pa ang pamasahe nga 25 pesos pasulod og 20 pesos pagawas sa maong barangay.
Lakip sa gi-angkon usab niini nga kolurom sila tungod kay wala sila makakuha og prangkisa apan gipamugos niini nga nagserbisyu gihapon sila sa katawhan.
Gipasabot matud pa nila ang mga sumasakay sa usbaw nga 5 pesos nga walay pagsupak usab ilabina kay walay laing masakyan pasulod og gawas sa naasuy nga barangay.
Sa kabahinan sa besi presidente sa asosasyon, maghangyu matud pa siya sa kadtong kulang gyud ang pamasahe apan dili na niini kontrolado ang iyang mga kaubanan sa maong hisgutanan.
Nasayran nga ang presidente sa maong grupo, anaa sa CTTMD nagtrabaho pinaagi ni Ernie Abasola.
Una nang nakadawat ang Bombo Radyo og reklamo mahitungod sa gipatuman niining usbaw sa plitehan.
Sa kabahinan usab ni Kapitan Joel Lapeña, giangkon niining wala siya masayud sa nasangpit nga usbaw sa plitehan.
Tungod niini, magpatawag siya og meeting sa mga drivers diin ang mga nangulo niini patambongon usab niya sa himoong pagdungog aron mahisgutan ang maong usbaw sa pamasahe.
Sumala pa niini nga mas maayung dunay public consultation aron makuha ang tanang panig dayung butyag nga masabtan ang gihimo sa mga drivers tungod na usab sa kamahal karun sa gasolina.
Nanawagan nalang kini og pagsinabtanay sa tanan taliwa sa sitwasyon nga atu karung giatubang.
Kini dayung hangyu sa iyang konstituwente nga kung dunay reklamo ipaabot sa barangay aron mahatagan og kasolbaran.
