BUTUAN CITY- Gikumpirma mismo sa Department of Agriculture kon DA- Surigao del Norte nga aduna na’y natalang kaso sa African Swine Fever kon ASF ang duha ka baranggay sa lungsod sa Claver, Surigao del Norte partikular ang barangay Bagacay ug Sapa sa maong lungsod.
Tungod niini gilayong gi-awhag ni Governor Francisco Matugas ang mga mayor sa mga lungsod nga magmuntar og checkpoint aron mapugngan ug dili makasulod ang mga baboy gikan sa gawas sa probinsya sa ingon nga dili mukanat ang maong sakit.
Sulod sa pito ka kilometro gikan sa duha ka barangay gihingusgan ang pag-monitor aron dili kini makatakod sa ubang dapit.
Nanawagan usab ang kadumalahan sa mga hog raiser nga mahimong responsable ug mokooparar sa mga panawagan aron gilayong ma-contain ug mawala ang maong sakit sa mga baboy.
Sa kasamtangan, nag require og drastic disease control ug preventive measures ingon man mass culling sa mga apektadong hog population ang lungsod sa claver human nakasulod ang maong klase sa sakit sa mga baboy.
