BUTUAN CITY -Upat na ka mga patay’ng lawas ang nakit-an human mitiklaob ang usa ka sakayan nga gisakyan sa mga migrante sa baybayon sa Senegal sa West Africa, samtang nagpadayon ang pagpangita sa ubang mga pasahero rasong gikabalak-ang mas daghan pa ang posibleng namatay.
Sumala ni Boubacar Seye, presidente sa non-government organization nga Horizons Sans Frontieres, labing menos 50 ka mga tawo ang sakay sa maong sakayan nga na-unlod duol sa lungsod sa Yenne, sa habagatang bahin sa Dakar, human kini nabangga sa bato samtang gibalhin ang mga migrante gikan sa gagmayng mga sakayan pangisda ngadto sa mas dakong kahoy nga sakayan nga gitawag og pirogue. Wala pa matino ang gidaghanon sa mga nawagtang nga pasahero.
Nahitabo ang insidente taliwala sa nagkadaghang pagsulay sa mga migrante gikan sa West Africa nga motabok sa Atlantic Ocean padulong sa Canary Islands sa Spain.
Base sa datos sa Spanish Interior Ministry, mikabat na sa 24,364 ka migrante ang naka-abot sa Canary Islands gikan Enero 1 hangtod Nobyembre 15 ning tuiga, kumpara sa 14,690 sa samang panahon ning miaging tuiga.
Samtang gikumpirma sa Senegalese Navy nga nakaluwas ug nasikop nila ang 1,424 ka mga tawo niadtong Nobyembre 16 ug 17, lakip ang mga pasahero sa siyam ka sakayan pangisda, isip kabahin sa ilang operasyon batok sa delikadong pagtabok sa mga migrante sa dagat.












