BUTUAN CITY – Gikumpirma sa Department of Foreign Affairs (DFA) nga mutambong si United States President Donald Trump sa Association of Southeast Asian Nations kon ASEAN-US Special Summit sa umalabot nga Nobyembre 17.
Ang tulo ka adlaw nga panagtigom nga ipahigayon gikan Nobyembre 15 hangtod 18 sa Philippine International Convention Center (PICC) sa Pasay City, magtigom sa mga lider sa Southeast Asia ug mga dialogue partners aron hisgutan ang nagkada-iyang hagit nga gi-atubang sa rehiyon ug sa tibuok kalibotan.
Pangunahan ni Pangulong Ferdinand Marcos Jr. ang summit nga magsugod sa Dominggo, diin hisgutan ang mga prayoridad sa ASEAN, lakip na ang kasamtangang sitwasyon sa Myanmar.
Magpahigayon usab og mga panagtagbo ang mga lider sa ASEAN uban sa mga magbabalaod, representante sa sektor sa negosyo ug mga grupo sa kabatan-onan isip kabahin sa maong mga summit.
Gila-uman nga mutambong ang mga lider gikan sa Vietnam, Cambodia, Brunei, Indonesia, Laos, Malaysia, Singapore, Thailand ug Timor-Leste.
Samtang ang Myanmar, representahan sa Director General sa ASEAN Affairs Department ubos sa ilang Foreign Ministry.
Motambong usab isip Guest of the Chair ang mga lider sa Brazil ug Canada, kauban ang ilang mga representante sa International Monetary Fund (IMF).
Magsugod sa Nobyembre 16 ang mga summit uban sa mga dialogue partners sa ASEAN ug magpadayon hangtod Nobyembre 17, diin moapil ang Australia, China, India, Japan, New Zealand, South Korea, Russia, United Nations ug United States of America.
Sumala sa DFA, ang maong panagtigom maghatag og kahigayonan aron mas mapalig-on ang kasamtangang mga panag-uban ug mapalambo pa ang kooperasyon sa pag-atubang sa nagkahiusang prayoridad sa rehiyon ug sa tibuok kalibotan.
Ang New Zealand magpadala sa ilang Deputy Prime Minister ug Foreign Minister, samtang ang Russia magpadala usab sa ilang Foreign Minister. Sa Nobyembre 17, pangulohan ni Pangulong Marcos ang ika-29 nga ASEAN Plus Three Summit ug ang ika-21 nga East Asia Summit, diin hisgutan ang mga estratehiko, politikal ug ekonomikanhong isyu.
Matapos ang maong panagtigom pinaagi sa pormal nga pagtugyan sa ASEAN chairmanship ngadto sa Singapore, nga sundan sa ASEAN-US Special Summit nga gitambongan ni US President Donald Trump.
