BUTUAN CITY – Opisyal nang gipagawas sa Samahang Basketbol ng Pilipinas (SBP) ang final 12-man line-up sa Gilas Pilipinas alang sa ikalimang window sa 2027 FIBA Basketball World Cup Asian Qualifiers nga ipahigayon sa Malaysia karong bulana.
Manguna sa Gilas si bag-ong naturalized Filipino player Bennie Boatwright, nga maghimo sa iyang debut alang sa national team kondiin mipuli siya kang Justin Brownlee nga dili maka-apil tungod sa health concerns may kalabotan sa blood pressure ug problema sa kasingkasing, base sa pagkumpirma ni head coach Tim Cone.
Samtang mubalik usab sa Gilas lineup si Rhenz Abando, nga unang higayon sukad sa 2023 FIBA Basketball World Cup nga makarepresentar pag-usab sa Pilipinas.
Mikumpleto sa 12-man lineup sila Kai Sotto; AJ Edu; Chris Newsome; Kevin Quiambao; Dwight Ramos; Juan Gomez de Liaño; Scottie Thompson; CJ Perez; Mike Phillips; ug Quentin Millora-Brown.
Wala ma-apil sa lineup si Carl Tamayo tungod sa ankle injury, samtang dili usab maka-apil si Calvin Oftana tungod kay magpa-abot siya sa pagpanganak sa iyang asawa.
Gawas sa pangdugang sa shooting ug height ni Boatwright, gilauman usab nga makatabang ang pagbalik ni Abando sa depensa ug opensa sa national team.
Ubos sa pagdumala ni head coach Tim Cone, mag-atubang ang Gilas sa Syria sa Nobyembre 27 ug Iran sa Nobyembre 29 sa Karisma Arena sa Seremban, Malaysia.
Sa pagkakaron, anaa sa ikalimang puwesto ang Pilipinas sa Group E dala ang 4-4 nga win-loss record. Importante ang ilang duha ka duwa aron mapalig-on ang kampanya nga makasulod sa 2027 FIBA Basketball World Cup sa Qatar.
