BUTUAN CITY- Nasikop sa kapulisan ang usa ka giila nga High-Value Individual (HVI) ug nakumpiskar ang gituohang shabu nga nagkantidad og P869,584 atol sa gihimong buy-bust operation sa Purok 4, Barangay Obrero, Butuan City karong adlawa.
Sumala kang Police Regional Office 13 Director PBGen Rolindo M. Suguilon, nailang alyas “Pablo,” 41 anyos, ug residente sa maong barangay ang nadakpan nga suspek.
Gipahigayon ang operasyon sa mga personahe sa Regional Drug Enforcement Unit 13, City Intelligence Unit sa Butuan City Police Office, ug Drug Enforcement Unit sa Butuan City Police Station 2, sa koordinasyon sa Philippine Drug Enforcement Agency Regional Office 13.
Nakumpiskar gikan sa suspek ang pipila ka sachet sa gituohang shabu nga may gibug-aton nga 127.88 gramos, lakip ang usa ka libong pisong marked money ug uban pang drug ug non-drug paraphernalia.
Nanawagan usab si PBGen Suguilon sa publiko nga padayon nga mosuporta sa kampanya sa PNP Caraga batok sa ilegal nga droga pinaagi sa pagreport sa bisan unsang kalihokan nga may kalabotan niini ngadto sa labing duol nga estasyon sa kapulisan, alang sa kaluwasan sa komunidad ug kaugmaon sa kabatan-onan.
Atubangon sa nadakpang suspek ang kasong paglapas sa Sections 5 ug 11, Article II sa Republic Act 9165 o Comprehensive Dangerous Drugs Act of 2002.
