BUTUAN CITY – Gipahibalo sa lokal nga kagamhanan sa General Luna, Siargao Islands ang permanenteng pagsira sa Malinao Skate Road subay sa direktiba sa Department of Public Works and Highways (DPWH), human sa pormal nga reklamo nga gisang-at ngadto sa Office of the Ombudsman.
Gidili na ang paggamit sa maong national road alang sa skateboarding, mga kalihokan sa kalingawan, komersiyal nga operasyon ug mga panagtapok nga wala’y otorisasyon, tungod kay supak kini sa balaod ug nagbutang sa peligro sa kaluwasan sa mga motorista ug mga moapil sa maong kalihokan.
Giawhag sa LGU ang mga lokal nga residente ug mga bisita nga motuman sa direktiba ug likayan na ang paggamit sa maong dalan isip skateboarding area.
Bisan pa niini, giila sa lokal nga kagamhanan ang dakong papel sa skateboarding culture sa General Luna, lakip ang epekto sa pagsira sa maong lugar ngadto sa mga lokal nga vendor ug gagmayng negosyante.
Isip alternatibong lugar, aktibo nang nakigtambayayong ang LGU sa mga hingtungdan alang sa pagtukod og usa ka pampublikong skatepark nga luwas ug legal nga magamit sa mga kabatan-onan ug skateboarding community.
Padayon usab ang pagproseso niini aron masiguro ang gikinahanglang pondo ug alokasyon sa badyet alang sa proyekto.
Gipasabot sa LGU nga gusto nilang masulbad ang isyu pinaagi sa koordinasyon ug maayong panag-istoryahanay uban sa DPWH ug ubang nasudnong ahensiya, imbes nga moabot pa sa legal nga panaglalis.
Kini subay na sa ilang tinguhang ipadayon ang pagpalambo sa turismo sa General Luna, apan kinahanglan nga ang tanang kalihokan subay sa balaod, responsable ug naghatag prayoridad sa kaluwasan sa publiko.
