BUTUAN CITY – Tutukan na sa Commission on Elections o COMELEC ang pagpangandam alang sa 2028 Presidential ug National and Local Elections human gipalig-on sa Korte Suprema ang constitutionality sa Republic Act No. 12326.
Ubos sa Republic Act 12326, gibalhin sa ikaduhang Lunes sa Nobyembre 2028 ang sunod nga Barangay and Sangguniang Kabataan Elections nga unta ipahigayon karong Nobyembre 2026. Gipasabot sa Korte Suprema nga ang pangunang tumong sa maong balaod mao ang pagtakda sa lima ka tuig nga termino sa mga opisyal sa barangay ug SK, ug dili lamang ang pagsibog sa eleksyon.
Gi-ila usab sa Korte Suprema ang panginahanglan nga hatagan og igong panahon ang COMELEC aron maandam ang May 2028 National and Local Elections, ilabina kay posibleng makaapekto sa pagpangandam sa ahensya ang pagpatuman sa Barangay Elections sa tuig 2027.
Samtang, naglatid usab ang RA 12326 nga ang bisan unsang wala magamit nga pondo alang sa gikanselar nga Barangay ug SK Elections magpabiling magamit sa COMELEC isip dugang nga tinubdan sa pondo alang sa pagpangandam sa 2028 National and Local Elections.
Sigon ni COMELEC chairman George Erwin Garcia, tungod sa pagpalig-on sa Korte Suprema sa maong balaod, wala na’y legal nga babag sa maong petisyon, hinungdan nga mahimo nang ipunting sa COMELEC ang ilang pagtagad sa mga gikinahanglang pagpangandam alang sa umaabot nga pinakadakong piniliay sa nasud.
