BUTUAN CITY – Nasikop sa kapulisan ug mga ka-ubang ahensiya sa gobyerno ang walo ka mga Chinese nationals nga mga residente sa Hunan ug Gansu provinces sa China apil na ang napulo ka mga Pinoy, atol sa gilusad nga operasyon sa Barangay Mabilin, Surigao City ning mi-aging adlaw. Miresulta usab kini sa pagkakumpiska sa mga ekipo nga gigamit sa ilegal nga pagmina nga mokabat sa P153.343-milyon.
Sumala sa Police Regional Office 13 kon PRO-13, kabahin ang operasyon sa padayong kampanya batok sa ilegal nga pagmina, pinaagi sa koordinasyon sa Mines and Geosciences Bureau kon MGB-Caraga, ug nagkada-iyang yunit sa Philippine National Police ug Armed Forces of the Philippines.
Gidayeg usab ni PRO-13 Director PBGen Rolindo Suguilon ang mga personahe sa nagkahi-usang mga ahensiya tungod sa malampusong operasyon, nga nagtumong pagpanalipod ug pagpreserbar sa mga kahinguhaan sa kina-iyahan.
Sa pagkakaron, gipabilin sa Surigao City Police Station ang mga dinakpan alang sa hustong legal nga proseso, samtang ang mga nakumpiskang bug-at nga ekipo ug mga gamit sa pagmina, anaa na sa kustodiya sa MGB-Caraga.
Gipasalig ni Suguilon nga ipadayon sa kapolisan ang tanang legal nga lakang aron mapanubag sa balaod ang mga responsable sa dinagkong operasyon sa ilegal nga pagmina.
