BUTUAN CITY – Hingpit nang gitangtang sa puwesto sa National Police Commission kon NAPOLCOM ang pulis nga tag-iya sa government-issued firearm nga gigamit sa pagpamusil sa San Jose National High School sa Tacloban City niadtong Hunyo 22 ning tuiga kondiin tulo ka estudyante ang namatay.
Gimando na sa NAPOLCOM ang pagtangtang sa puwesto kang Police Staff Sergeant Arla Ray Paciencia gikan sa Regional Finance Service Unit sa Eastern Visayas Police tungod sa grave misconduct ug dili angay nga pamatasan alang sa usa ka pulis.
Kahinumdomang gibiyaan ni Paciencia ang iyang service-issued nga 9mm pistol sulod sa usa ka plastic gun box nga gibutang sa plastic cabinet sa ilang balay, imbes nga ibutang kini sa usa ka safety vault o luwas nga sudlanan kondiin supak kini sa mga lagda sa Philippine National Police o PNP kabahin sa hustong pagtipig ug pagpanalipod sa mga armas.
Matud sa komisyon, ang pagpasagad ni Paciencia, nakatampo sa nahitabong pagpamusil human nakakuha og access sa iyang armas ang iyang 14-anyos nga pag-umangkon.
Gibawi usab sa NAPOLCOM ang mga benepisyo nga uban sa iyang posisyon ug gidid-an siya sa tibuok niyang kinabuhi paghawid o pag-okupa sa bisan unsang posisyon sa gobyerno.
Samtang, gipahinumdoman pag-usab sa NAPOLCOM ang kapulisan nga ang hustong pagdumala ug luwas nga pagtipig sa mga armas nga gihatag sa gobyerno maoy mga responsibilidad nga dili angay pasagdan o balewalaon.
