BUTUAN CITY – Muhimo og beripikasyon ang Philippine National Police (PNP) sa mga taho nga ang mga iligal nga drogas nga nakumpiska sa Laos ug Thailand nakatakdang dalhon sa Pilipinas, tungod kay wala pay igong ebidensiyang nagpamatood nga dinhe gayud ang destinasyon sa mga niini.
Sigon ni PNP Public Information Office chief PCol. Allen Rae Co, nakig-alayon na ang mga awtoridad sa ubang nasud aron matumbok ang tinood nga destinasyon sa mga nakumpiskang droga ug kung dunay mga Pilipinong nalambigit.
Base sa impormasyon, usa ka pribadong jet nga gipanag-iyahan sa Malaysia ang mitugpa sa Laos diin isakay ang mga droga para dalhon sa Pilipinas.
Bisan paman niini, wala pay nahatag nga dokumento o ubang ebidensiya nga nagpamatood nga Manila ang destinasyon sa kargamento.
Sigon ni Co nga susihon sa mga imbestigador ang flight plan, cargo manifest ug uban pang rekord aron matumbok ang aktuwal nga ruta ug destinasyon.
Gi-imbestigahan usab sa PNP ang mga taho mahitungod sa mga drogang nakumpiska sa Thailand nga matud pa nakatakdang dalhon sa Pilipinas, lakip na ang mga gipa-agi sa dagat.
Nakig-alayon ang PNP Drug Enforcement Group (PDEG), mga lokal nga kapulisan og Philippine Drug Enforcement Agency (PDEA) sa mga awtoridad sa ubang nasud aron klaruhon ang duha ka insidente.
Nagpasidaan si Co batuk sa hinanaling paglambigit sa Pilipinas sa mga nakumpiska nga droga base lang sa pamahayag sa mga langyaw nga awtoridad. Padayon usab nga gimonitor sa kapulisan ang mga gidudahang international drug syndicate lakip na ang posibleng paggamit sa Pilipinas isip transshipment point o katapusang destinasyon sa iligal nga droga.
Kung mapamatud-ang sa Pilipinas nakatakdang dalhon ang mga droga, gikalipay sa mga awtoridad nga nababagan ang mga niini adiser nakaabot sa nasud.
