BUTUAN CITY- Mipahimangno ang Department of Health kon DOH sa publiko nga dili baligya ang mga human organs ug kinahanglan sundon ang tukmang proseso ug mga pamaagi sa organ donation ug transplantation.
Sumala ni DOH Undersecretary Dr. Albert Domingo, Presidente sa Essential Life-Saving Services Cluster, nga importante ang papel sa Philippine Network for Organ Sharing kon PhilNOS sa pagpataas sa kahibalo bahin sa organ donation ug patas ug etikal nga pag-apod-apod sa mga organo.
Gitukod sa PhilNOS ang sistema alang sa tukmang referral, pagproseso sa posibleng organ donors, patas nga pag-allocate, ug episyenteng pagkuha ug pag-transplant sa mga organs.
Gipasiugda ni Domingo nga ang publiko kinahanglan mosalikway sa bisan unsang tanyag nga pagbaligya sa organo, ilabi na sa kidney, human sa pahimangno sa National Kidney and Transplant Institute batok sa mga post o pahayag bahin sa pagbaligya niini.
Kini nahitabo samtang mikaylap sa social media ang mga komedya bahin sa pagbaligya sa kidney aron makapalit og bag-ong gadgets. Sigon ni Domingo, kinahanglan seryosohon kini nga isyu tungod ang organ donation usa ka “regalo sa kinabuhi” ug dili angay himuong komedya o paagi sa pagbaligya.
