BUTUAN CITY – Anaa na sa consultation process ang Regional Tripartite, Wages and Productivity Board kon RTWPB-Caraga sa ilang gihimong wage fixing review kansa gipatuman base sa ilang guidelines human nila kini gisugdan sa Cabadbaran City sa Agusan del Norte nga gisundan sa Tandag City ug Bislig City pulos sakop sa Surigao del Sur.
Sa eksklusibong pakighinabi sa Bombo Radyo Butuan, gipadayag ni Earl de la Victoria, ang board secretary sa maong ahensya, walo ka mga konsultasyon ang ilang himuon dinhi sa Caraga Region kansa tambungan sa ilang piliong mga sektor aron makuhaan sa ilang mga ideya.
Gipasabot niining limitado lamang ang konsultasyon sa mga representante sa managlahing sektor tungod kay dili man kini bukas ngadto sa publiko nga tambungan sa mga resource persons gikan sa managlahing ahensya sa gobyerno nga maoy muhatag og update sa dagan sa ekonomiya karon sa nasud nga magamit na unya sa himuong public hearing.
Alayon niini, ilang himuon sunod semana ang blended consultation nga himuon sa Surigao City nga pangunahan sa Department of Labor and Employment kon DOLE-regional director ug ubanan sa mga board members nga mutambong online.
Sama sa mga regular consultations, mangimbitar usab sila og mga representante gikan sa managlahing sektor sa nasangpit nga isla aron ilang makuha ang pulso sa suhulan sa ilang mga mamumuo na sundan usab didto sa San Francisco, Agusan del Sur.
Gipasabot pa sa opisyal nga sa proseso sa wage review, mag-ihap sila og 60 ka adlaw adiser ang anibersaryo sa pinaka-ulahing wage order base sa ilang gisubay nga kalendaryo kon guidelines.
Dinhi sa rehiyon, karong Enero 3 sunod tuig ng anibersaryo sa ilang wage order kondiin mu-atras sila og 60 ka mga adlaw alang sa himuon nga mga public hearings nga himuon lang human usab sa unang pagpahigayon og mga konsultasyon.
