BUTUAN CITY – Mi-abot sa ₱15,313-mil,600.00 ang kantidad sa kapin 2.2-kilos nga suspected shabu nga nakumpiska sa gilusad nga drug buy-bust operation kaganinang alas-3:14 sa kaadlawon sulod sa usa sa mga lawak sa Beehive Lodge sa Purok 1, Brgy Bancasi ning siyudad sa Butuan.
Ang operasyong gipangunahan sa Regional Drug Enforcement Unit-13, miresulta sa pagkasikop sa tulo ka mga drug personalities nga gilangkuban nila alyas Berto, 48-anyos; minyo, residente sa Brgy Basilisa, lungsod sa RTR, Agusan del Norte; alyas Dandan, 32-anyos, duna’y ka-ipon, residente sa Purok 7, Brgy Tolosa, Cabadbaran City ug alyas Wenwen, 27-anyos, dalaga ug residente sa Brgy Doongan ning siyudad sa Butuan.
Narekober sa operasyon ang walo ka selyadong transparent sachets sa suspected shabu uban sa duha ka wala pa maselyuhing sachets nga duna’y sulod nga susamang epektos, mga drug paraphernalia ingon man kutsara nga gigamit pagtakos sa maong ilegal nga druga ug timbangan sa bugas nga mao na’y gigamit pagtimbang sa ilang gipangtimbang ug gitakal-takal na nga druga.
Gikostudiya na ang mga drug personalities uban sa nakumpiskang ilegal nga mga druga sa egional Drug Enforcement Unit-13 alang sa tukmang disposasyon.
