BUTUAN CITY – Gipasidunggan sa Philippine Normal University sa degree nga Doctor in Physical Education and Sports, Honoris Causa, ang kanhi kampeon sa natad sa boxing nga si Manny Pacquiao.
Gihatag ang nasangpit nga pasidungog atol sa ika-125 nga Founding Anniversary sa unibersidad isip pag-ila sa dakong natampo niini sa paugnat sa kusog ug paghatag og insipirasyon sa kabataang pilipino.
Sa iyang pagpamulong, gipa-ambit ni Pacquiao nga ang disiplina ug mga leksyon nga iyang nakuha gikan sa paugnat sa kusog, nakatabang kaniya nga maningkamot pag-ayo ug atubangon ang mga hagit sa kinabuhi.
Gipadayag usab sa kampiyon nga ang tinuod nga edukasyon angay nga magpalambo sa kinaiya, pagpangulo, ug pagkatawo sa usa ka indibidwal.
Gi-awhag usab ni Pacquiao ang mga kabataang Pilipino nga padayong magdamgo og dako, pagkamapahi-ubsanon, ug gamiton ang kalampusan aron makatabang sa katawhan.
