BUTUAN CITY – Gitugotan ni Senate Impeachment Court Presiding Officer Chiz Escudero ang pagpresenta kang retiradong Sandiganbayan Presiding Justice Amparo Cabotaje-Tang isip testigo sa pagdungog sa Article II sa impeachment case batok kang Vice President Sara Duterte. Ang maong artikulo nagtutok sa alegasyon sa unexplained wealth, o bahandi nga gika-ingong dili tukma sa iyang legal nga kita isip public official, lakip ang alegasyon sa dili hingpit nga pagdeklara sa mga kabtangan ug interes sa negosyo.
Misupak sa pagpresentar kang Cabotaje-Tang si Senator-Judge Imee Marcos ug defense counsel Mark Vinluan sa rason nga ang kanhi posisyon ni Cabotaje-Tang isip Sandiganbayan justice, walay direktang kalambigitan sa partikular nga mga alegasyon batok kang Duterte.
Bisan pa niini, giklaro ni Escudero nga katungod sa matag-panig nga makapresentar sa ilang mga testigo, ilabina kung sa ilang tan-aw, makatabang kini pag-establisar sa ilang argumento.
Sumala sa House prosecution, ang testimonya ni Cabotaje-Tang maghisgot sa mga prinsipyo sa public accountability, integridad sa public office, ug mga mekanismo sa pag-atubang sa undisclosed o unexplained wealth ug mga gidili nga business interests.
Nasayrang dili lang si Cabotaje-Tang ang ipresentar nga testigo kondili lakip usab sa unang mga saksi ang Ombudsman Records Division Officer-in-Charge Atty. Karen Batu, nga motan-aw sa mga rekord ug SALN-related documents, ug SEC Company Registration and Monitoring Department Director Atty. Gerardo Del Rosario, nga motestigo bahin sa corporate records, ownership ug business interests nga may kalabotan sa kaso.
