BUTUAN CITY – Nagmugna og Yusho Steve Bag-ao Task Group ang Cabadbaran City government sa lalawigan sa Agusan del Norte aron mahatagan og hustisya ang pagkamatay sa Grade 10 student atol sa pagdula og badminton sa intramurals sa Mindanao Institute kon MI.
Kini human magpakitabang ang pamilya sa estudyante kang Cabadbaran City Mayor Judy Chin Amante aron mahatagan og hustisya ang pagkamatay niini ilabina kay nahitabo kini tunga-tunga sa pagpatuman sa face-to-face class suspension tungod sa taas nga heat index.
Sumala pa ni Cabadbaran City government spokesperson Roselyn Exaure, tutukan sa task force ang posibilidad nga dunay usa ka tawong makonsiderang responsable sa pagkamtay niini.
Nasuta pa sa inisyal nga imbestigasyon sa kapulisan nga niadtong adlaw sa dula ni Bag-ao sirado ang school clinic tungod kay namiyesta matud pa ang school nurse sa usa sa lang mga barangay.
Dugang pa ni Exaure nga hugot ang patakaran ni Mayor Amante nga kung ang estudyante anaa sa sulod sa tunghaan, responsable na sa mga hingtungdang magtutudlo ang kaluwasan sa mga niini.
Migawas pa sa imbestigasyon nga wala gisunod sa tunghaan ang gipagawas nga advisory sa mayor nga hangtud alas-onse lang sa buntag ang face-to-face classes sa tanang mga tunghaan sa nasangpit nga siyudad tungod sa taas nga heat index.
Sa karun gipaabot na lang sa Cabadbaran City LGU ang resulta sa imbestigasyon sa ilang kapulisan nga gilaumang ipagawas sa unang pagtigom sa mga miyembro sa task force.
