BUTUAN CITY- Gipasidunggan sa National Historical Commission of the Philippines kon NHCP ang kamahinungdanon sa pagsaulog sa National Heroes Day isip higayon sa pag-ila ug pagpasalamat sa nagkalain-laing mga Pilipinong bayani nga naghalad sa ilang kaalam, kusog, panahon, kagawasan ug bisan sa ilang kaugalingong kinabuhi alang sa nasud.
Sumala ni NHCP History Researcher II Aljon Concillado, dili lamang kini paghinumdom sa mga iladong bayani kundili usab pag-ila sa tanang mga Pilipinong mibarog ug nagserbisyo alang sa kaayohan sa nasud, adunay ngalan man o wala.
Giila usab niini, nga kini ang usa sa labing mahinungdanong bulan sa kasaysayan sa Pilipinas ang Agosto tungod dinhi nahitabo ang dagkong panghitabo, lakip na ang Himagsikang Pilipino niadtong 1896 batok sa mga mananakop.
Pinaagi sa Act No. 3827 nga gipasa niadtong Oktubre 1931, unang gitakda ang katapusang semana sa Agosto isip National Heroes Day, nga sa ulahing mga kausaban sa balaod gibalhin ngadto sa katapusang Lunes sa bulan sa Agosto aron padayon nga mapasidunggan ang mga bayaning Pilipino sa nagkalain-laing panahon sa kasaysayan.
Gipasabot usab ni Concillado nga bisan daghan ang nagtuong si Dr. Jose Rizal ang bugtong National Hero sa Pilipinas, wala’y balaod nga pormal nga nagtudlo kaniya o bisan kang kinsa isip nag-inusarang nasudnong bayani sa nasud.
Sigon pa niini, daghan ang giila nga mga bayaning Pilipino lakip sila Jose Rizal, Andres Bonifacio, Emilio Aguinaldo, Apolinario Mabini, Marcelo H. del Pilar ug uban pa, apan wala kini gi-monopolyo sa pipila lamang ka mga pangalan tungod kay daghan pang mga Pilipino nga adunay dakong kontribusyon sa kagawasan ug kasaysayan sa nasud.
Busa, sumala ni Concillado, importante ang pagsaulog sa National Heroes Day aron mahatagan usab og pag-ila ang mga bayaning dili kaayo popular o kanunay madunggan ug matun-an sa mga eskwelahan, samtang padayong ginapasidunggan ang tanang Pilipinong naghalad sa ilang kaugalingon alang sa kaayohan ug kagawasan sa nasud.
